Vorlesung Vorlesung in lateinischer Sprache De Romanorum studiis philosophicis

Vorlesung (in lateinischer Sprache): De Romanorum studiis philosophicis 1std., Mo 14-15 Uhr. Beginn: 6.10.2014, Ende: 26.1.2015 Graecorum philosophiam Romani sero, sed serio amplexi sunt. Ac primus quidem Ennius Annalibus suis nonnulla e Pythagoreorum disciplina admiscuit; tum Varro in Saturis Menippeis nunc magna e parte deperditis multa ex intima philosophia hausisse traditur. Maxime autem haec studia a Cicerone Academico aucta sunt, qui et dialogis ad imitationem Platonis factis et aliis scriptis plurimis paene cunctas philosophiae partes ita explicavit, ut is nunc omnis philosophiae hellenisticae q.d. fons praecipuus habeatur. Contra Lucretius Epicureus, qui eodem fere tempore scripsit, sat habuit rerum naturam, i.e. physicam siue philosophiam naturalem, carmine didactico pertexere – sed quanto animi ardore! Postea Seneca disciplinam Stoicam paene totam – nam unam logicam minus curavisse videtur – scriptis suis mira facundia illustravit. De his igitur scriptoribus praecipue agendum erit; nec tamen Apuleium Platonicum Christianosque philosophos, inter quos Lactantius Cicero Christianus et aureus Augustinus eminent, negligemus. – Ad singulas scholas chartulae, quae dictorum summaria continent, distribuentur. Venite auresque et animos attendite! Hi libri commendantur: H. Ritter / L. Preller, Historia philosophiae Graeco-Romanae, Hamburgi 1838; Giovanna Garbarino, Roma e la filosofia greca dalle origini alla fine del II secolo A.C., 2 vol., Augustae Taurinorum 1973; H. Flashar (ed.), Die Philosophie der Antike, vol. 4: Die hellenistische Philosophie, Basileae 1994 (ubi Gawlick et Goerler de Cicerone, Erler de Lucretio); Fr. Ricken (ed.), Philosophen der Antike II, Stutgardiae & al. 1996; M. Griffin / J. Barnes (edd.), Philosophia togata, Oxonii 1989; J. Barnes / M. Griffin (edd.), Philosophia togata II, Oxonii 1997; B. Inwood, Reading Seneca: Stoic philosophy at Rome, Oxford 2005; Jula Wildberger / Marcia L. Colish (ed.), Seneca philosophus, Berolini 2014. Department II - Griechische und Lateinische, Romanische, Italienische und Slavische Philologie, Sprachen und Kommunikation LMU München WiSe 1415 Prof. Dr. Stroh Wilfried